Урачыстае адкрыццё міжнароднай спецыялізаванай выстаўкі "Белагра-2019" адбудзецца сёння ў гандлёва-лагістычным цэнтры "Глобус Парк" у аграгарадку Шчомысліца Мінскага раёна, паведамілі БЕЛТА ў Міністэрстве сельскай гаспадаркі і харчавання.
Удзел у выстаўцы прымуць больш за 550 кампаній з 29 краін (Аўстрыя, Беларусь, Балгарыя, Вялікабрытанія, Венгрыя, Германія, Данія, Ізраіль, Індыя, Італія, Іспанія, Канада, Кітай, Літва, Латвія, Эстонія, Нідэрланды, Польшча, Расія, Славакія , Славенія, ЗША, Турцыя, Украіна, Фінляндыя, Францыя, Чэхія, Швейцарыя, Швецыя).
На адкрытай пляцоўцы можна будзе азнаёміцца з сучаснай сельскагаспадарчай тэхнікай (больш за 300 узораў). У прыватнасці, шырока будзе прадстаўлена тэхніка для ўнясення ўгнаенняў і абароны раслін, для ўборкі збожжавых і нарыхтоўкі кармоў, машыны для меліярацыйных работ, апрацоўкі і ўборкі бульбы і агародніны. Сельскагаспадарчая прадукцыя, машыны, абсталяванне будуць дэманстравацца ў тэхналагічным ланцужку з сучаснымі энергазберагальнымі тэхналогіямі ўсіх галін, звязанымі як з вытворчасцю прадукцыі, так і з яе перапрацоўкай, транспарціроўкай, захоўваннем. Паралельна з беларускімі вытворцамі сельскагаспадарчай тэхнікі свае распрацоўкі прадэманструюць замежныя кампаніі. Традыцыйна будзе праходзіць і выстаўка рэтра-тэхнікі.
Адной з галоўных навінак бягучага года стане інавацыйная экспазіцыя "Эксперыментальнае поле". Сарты збожжавых культур тут былі пасеяныя ў верасні 2018 года. На выстаўцы можна будзе ўбачыць, параўнаць і ацаніць усходы эксперыментальных сартоў азімай пшаніцы, трыцікале, жыта і ячменю, якія прадставяць НПЦ НАН Беларусі па земляробстве, а таксама нямецкія кампаніі.
Штогод "Белагра" становіцца адной з галоўных пляцовак для дзелавых перагавораў. Гэту выстаўку наведаюць больш за 30 афіцыйных дэлегацый з розных краін. Шырокае кола пытанняў па забеспячэнні канкурэнтаздольнасці сельгаспрадукцыі, выкарыстанні зямельных рэсурсаў з пункту гледжання экалагічнай і эканамічнай эфектыўнасці, перспектывы супрацоўніцтва Беларусі з краінамі блізкага і далёкага замежжа ў сферы вытворчасці інавацыйных тэхналогій у галіне сельскай гаспадаркі, а таксама іншыя актуальныя пытанні можна будзе абмеркаваць на тэматычных канферэнцыях і семінарах.
Праграма напоўнена практычнымі дэманстрацыямі, прэзентацыямі, майстар-класамі і конкурсамі. У прыватнасці, у дні выстаўкі пройдуць дэгустацыйны конкурс "Чэмпіён смаку", конкурс на лепшую племянную карову, конкурс "Лепшы араты", адкрыты аўкцыён па продажы племянных жывёл, выстаўка сельскагаспадарчых жывёл і іншыя мерапрыемствы.
29-я міжнародная спецыялізаваная выстаўка "Белагра-2019" пройдзе 4-9 чэрвеня. Яе арганізатарам выступае ЗАТ "Мінскэкспа", суарганізатарам - IFW-expo. Выстаўка арганізавана пры падтрымцы і ўдзеле Міністэрства сельскай гаспадаркі і харчавання, Міністэрства прамысловасці і Нацыянальнай акадэміі навук Беларусі.
Акрамя "Белагра-2019" у час Беларускага аграпрамысловага тыдня з 4 па 9 чэрвеня ў Мінскім раёне пройдуць міжнародныя спецыялізаваныя выстаўкі "Белферма", "Белпрадукт", "Харчмаш. Холад. Упак".
