У Беларусі зарэгістравана вакцына "Спадарожнік Лайт", паведамілі БЕЛТА ў прэс-службе Міністэрства аховы здароўя.

"На падставе рашэння камісіі па лекавых сродках Міністэрства аховы здароўя 3 чэрвеня прынята рашэнне аб дзяржаўнай рэгістрацыі вакцыны "Спадарожнік Лайт", - расказалі ў прэс-службе.

У Міністэрстве аховы здароўя растлумачылі, што гэта вектарная вакцына для прафілактыкі каранавіруснай інфекцыі, выкліканай вірусам SARS-CoV-2. Трымальнік рэгістрацыйнага дасье лекавага прэпарату - ФДБУ НДЦЭМ імя Н.Ф. Гамалеі Міністэрства аховы здароўя Расіі. Тэрмін дзеяння дзяржаўнай рэгістрацыі складае 1 год.

У адпаведнасці з загадам Міністэрства аховы здароўя эксперты Цэнтра экспертыз і выпрабаванняў у ахове здароўя, вядучыя інфекцыяністы рэспублікі і супрацоўнікі рэспубліканскіх навукова-практычных цэнтраў правялі ацэнку матэрыялаў рэгістрацыйнага дасье. "Прадстаўленыя ў матэрыялах дасье дакументы ўключаюць дастатковую інфармацыю, якая дазваляе ацаніць паказчыкі бяспекі, эфектыўнасці і якасці прэпарату", - адзначылі ў прэс-службе.

Вакцына "Спадарожнік Лайт" - аднадозавая вакцына, якая стварае спецыфічны клетачны і гумаральны імунітэт да віруса SARS CoV-2. Параметры імунагеннасці вакцыны даюць магчымасць сфарміраваць дастатковы імунны адказ на 28-ы дзень пасля прышчэпкі. Найбольш выяўлены імунны адказ і, адпаведна, эфектыўнасць прымянення гэтай вакцыны будзе ў людзей з папярэднім імунітэтам да COVID-19. У час першых фаз клінічных даследаванняў было паказана, што ў людзей, якія маюць антыцелы пасля перанесенай інфекцыі COVID-19, у тым ліку ў бессімптомнай форме, адбываецца істотнае нарастанне цітраў антыцел на 10-ы дзень пасля прышчэпкі вакцынай "Спадарожнік Лайт".

У Міністэрстве аховы здароўя дадалі, што профіль бяспекі вакцыны "Спадарожнік Лайт" - стандартны для гэтага тыпу вектарных вакцын. Вакцына заснавана на вектары адэнавіруса 26 тыпу, гэта значыць уключае ў сябе першы кампанент вядомай і шырока прымяняемай вакцыны "Спадарожнік V". Прынцыпова важна тое, што прымяненне вакцыны дазволіць пашырыць аб'ём вакцынацыі і адказаць на высокі запыт у грамадстве на імунную ахову ад COVID-19, а таксама вакцынаваць людзей, якія перанеслі ўжо COVID-19.

На базе моладзевага цэнтра «Парэчка» ратавальнікі Смалявіцкага РАНС сумесна з работнікамі ДУ "Смалявіцкі ТЦСАН» правялі квэст-гульню для шматдзетных сем'яў.

Кожнай камандзе трэба было прайсці розныя выпрабаванні: ад праходжання тэставання па асновах бяспекі жыццядзейнасці і рашэнні галаваломак да надзявання баявой адзення ратавальнікаў на час. Акрамя гэтага, хлопцы падчас інтэрактыўнай гульні ўспомнілі алгарытм дзеянняў пры ўзнікненні пажару, а з ужо ўпадабанымі героямі з «Чароўнай кнігі» удзельнікі акцыі даведаліся аб небяспечных месцах для гульняў.

Кожная каманда атрымала памятныя і карысныя прызы.

Як адзначылі ўдзельнікі акцыі, паўтараць правілы бяспекі такім чынам значна цікавей і прасцей, чым завучваць іх з кнігі. А арганізатары мерапрыемства перакананыя, што кожны з удзельнікаў акцыі цяпер узброены важнымі ведамі, якія дапамогуць прадухіліць бяду.

У бальніцах і паліклініках Беларусі праводзіцца папярэдні запіс на вакцынацыю супраць COVID-19. Такая інфармацыя размешчана на сайце Міністэрства аховы здароўя, паведамляе БЕЛТА.

"Цяпер ва ўстановах аховы здароўя Беларусі праводзіцца папярэдні запіс грамадзян, якія жадаюць вакцынавацца супраць каранавіруснай інфекцыі", - гаворыцца ў паведамленні.

На сайце міністэрства размешчана спасылка на пералік арганізацый аховы здароўя, якія задзейнічаны ў вакцынацыі. Напрыклад, у Мінскай вобласці гэта Бярэзінская, Вілейская, Валожынская, Дзяржынская, Клецкая, Капыльская, Крупская, Лагойская, Любанская, Мядзельская, Нясвіжская, Мар'інагорская, Слуцкая, Смалявіцкая ЦРБ, паліклінікі нумар 1, 2, 3, 4 у Барысаве, Жодзінская ЦГБ і іншыя.

На сённяшні дзень першую дозу вакцыны супраць COVID-19 атрымалі больш за 542,3 тыс. чалавек, з іх больш за 297,1 тыс. прайшлі поўны курс вакцынацыі.

Зусім хутка - 10 чэрвеня - выпускнікі атрымаюць атэстаты і назаўсёды развітаюцца са школай. Як паведамілі ва ўпраўленні па адукацыі, спорту і турызму Смалявіцкага райвыканкама, выпускныя вечары ў гэтым годзе пройдуць на базе ўстаноў адукацыі.

Нагадаем, пры сустрэчы старшыні райвыканкама Андрэя Ратамскага з 11-класнікі першай гарадской школы, якія выступілі за правядзенне раённага выпускнога балю на гарадской плошчы, кіраванні па адукацыі, спорту і турызму было прапанавана вывучыць меркаванне ўсіх выпускнікоў раёна. Выключна іх пажаданне легла ў аснову прынятага рашэння.

З 163 апытаных выпускнікоў 52 выступілі «за» і 111 - «супраць» свята на плошчы. Кіраўніцтва раёна прыняло бок большасці выпускнікоў, якія пажадалі, каб выпускны вечар прайшоў у сценах роднай школы.

Але гэта яшчэ не ўсё. Па рашэнні райвыканкама, 10 чэрвеня ў Смалявіцкім гарадскім Доме культуры адбудзецца раённае мерапрыемства "Вяршыня поспеху». На ім у пяці намінацыях - «Медалісты», «Лідэр», «Спорт», «Навука» і «Творчасць» - будуць узнагароджаны лепшыя навучэнцы раёна.

Беларускія лесаводы высадзілі амаль 200 млн дрэў гэтай вясной, паведамілі БЕЛТА ў прэс-службе Міністэрства лясной гаспадаркі.

"Лесагаспадарчыя ўстановы краіны падвялі вынікі вясенняга лесакультурнага сезона. Усяго за некалькі месяцаў рукамі лесаводаў было створана каля 34,7 тыс. га лясных культур - гэта прыкладна 200 млн высаджаных дрэў. Лясгасы датэрмінова выканалі гадавы план сяўбы і пасадкі лесу і перавыканалі план вясенняй пасадкі, які складаў каля 32 тыс. га", - расказалі ў прэс-службе.

Стварэнне лясных культур будзе прадоўжана восенню. Такім чынам, фактычныя аб'ёмы лесааднаўлення будуць прыкметна вышэйшыя за плануемыя.

Найбольшая колькасць лясных культур была створана гомельскімі лесаводамі (12 014 га) - гэта звязана з неабходнасцю аднаўлення ўчасткаў, пашкоджаных караедным усыханнем. Брэсцкія лесаводы гэтай вясной стварылі 4964 га лясных культур, віцебскія - 3633 га, гродзенскія - 4056 га, мінскія - 5598 га, магілёўскія - 4432 га. Паказальна, што больш за палавіну лясных культур было створана селекцыйным пасяўным і пасадачным матэрыяламі (19,5 тыс. га).

Лесаводы таксама праводзілі работы па дапаўненні лясных культур. Гэтай вясной яны былі праведзены на плошчы амаль 24,5 тыс. га.