З 1 снежня беларускія аўтамабілісты павінны былі змяніць летнюю гуму на зімовыя шыны. У заключны дзень акцыі па прафілактыцы і папярэджанні дарожна-транспартных здарэнняў у зімовы перыяд карэспандэнт «КС» разам з супрацоўнікамі АДАІ Смалявіцкага РАУС Дзмітрыем Гарадко і Ірынай Стральцовай адправіліся ў рэйд, каб паглядзець, ці ўсё смалявічане выконваюць правілы.
Рэйд праходзіў па Смалявічах і ваколіцах. Хай зіма яшчэ не ўступіла ў поўнай меры ў свае правы, няма снегу і наледзі, але снежаньскае надвор'е няўстойлівае, мяняецца кожны дзень. Таму ўдзельнікам дарожнага руху трэба быць напагатове.
- Большасць кіроўцаў у гэтым годзе паставілася да сваёй бяспекі сур'ёзна, - адзначае старшы дзяржаўтаінспектар Дзмітрый Гарадко. - Аднак парушэнні сустракаюцца. У некаторых кіроўцаў, спыненых у ходзе рэйду, была ўстаноўлена зімовая гума, але вышыня малюнка пратэктара была ніжэй дапушчальнай нормы — менш за 4 мм.
Большасць аўтамабілістаў прызналіся, нягледзячы на тое, што восень і пачатак зімы былі незвычайна цёплымі, з паніжэннем тэмпературы ніжэй сямі градусаў са знакам плюс, паспяшаліся на шынамантажы: загадзя "пераабуць" аўто. Асабістая бяспека даражэй.
- Розніца паміж зімовай і летняй гумай на дарозе вельмі адчувальная, - прызнаецца смалявічанін Дзмітрый. - У горадзе, дзе дарогі больш чыстыя, гэта, можа, і не так прыкметна, але за горадам машына на дарозе няўстойлівая, яе водзіць. Тое, што Дзяржаўтаінспекцыя ўважліва сочыць за тым, ці ўсе аўтамабілісты выкарыстоўваюць зімовую гуму, бо адна "непераабутая" на дарозе машына можа прывесці да аварыі і да пацярпелых.
- Зімовая дарога тоіць у сабе больш небяспек, чым летняя, - кажа інспектар ДПС Ірына Стральцова. — Таму хочацца нагадаць вадзіцелям быць асцярожней і больш уважлівымі на дарозе. А яшчэ - не эканоміць на гуме. І не ўсталёўваць зімовыя шыны толькі на пярэдняй восі аўтамабіля, пакідаючы на задняй "лета". Такая эканомія ўплывае на бяспеку і па законе з'яўляецца адміністрацыйным правапарушэннем.
Хочацца нагадаць аўтамабілістам, што згодна з ч. 5 арт. 18.22 КоАП, калі на аўтамашыне ўсталявана летняя гума, то кіроўца атрымае папярэджанне або заплаціць штраф да 12,75 рублёў.
Зімовыя шыны ўсталёўваюцца на ўсіх колах аўтамабіля і павінны мець дастатковую вышыню малюнка пратэктара не менш 4 мм. Калі вышыня малюнка менш названай, то, згодна з ч. 3 арт. 18. 12 КоАП, аўтаўладальнік атрымае папярэджанне або штраф да 25,5 рублёў. За паўторнае на працягу года парушэнне (ч. 9 арт. 18.12 КоАП) — ад 51 да 122 рублёў.
- У сувязі са складанымі ўмовамі надвор'я ДАІ настойліва рэкамендуе перайсці на зімовы стыль кіравання, - кажа Ірына Стральцова. - Недастаткова проста змяніць гуму. Важна павялічваць дыстанцыю паміж аўто ў патоку, сачыць за бакавым інтэрвалам, не рабіць рэзкіх рухаў на дарозе. Хуткасны рэжым трэба знізіць і па магчымасці адмовіцца ад абгону.
