Урад зацвердзіў нацыянальны план дзеянняў па развіцці зялёнай эканомікі ў Беларусі на 2021-2025 гады. Гэта прадугледжана пастановай Савета Міністраў ад 10 снежня 2021 года нумар 710, паведамляе БЕЛТА са спасылкай на Нацыянальны прававы інтэрнэт-партал.

"За апошнія тры дзесяцігоддзі зялёная эканоміка не толькі заняла цэнтральнае месца ў глабальным парадку дня, але і выступае актыўным драйверам эканамічнага росту, садзейнічаючы дасягненню Мэт устойлівага развіцця. Большасць краін свету пераарыентавала сваю экалагічную палітыку на пераход ад традыцыйнай мадэлі, у якой ахова навакольнага асяроддзя разглядаецца як нагрузка на эканоміку, да мадэлі, у якой экалогія выступае рухавіком развіцця, гэта значыць да зялёнай эканомікі", - гаворыцца ў дакуменце.

У якасці стратэгічнай мэты зацверджанага плана вызначана развіццё інклюзіўнай, разумнай і лічбавай зялёнай эканомікі, якая садзейнічае дасягненню эканамічнага росту. Яе развіццё ў краіне грунтуецца на прынцыпах устойлівага развіцця, інклюзіўнасці, міжсектаральнасці, інавацыйнасці, навуковасці, экаэфектыўнасці і дастатковасці, рэсурсазберажэння, кіравання адходамі як рэсурсамі, павышэння канкурэнтаздольнасці і ўмацавання займаемых пазіцый на сусветных рынках з улікам глабальных тэндэнцый экалагізацыі, транспарэнтнасці, міжнароднага супрацоўніцтва і адказнасці.

Нацплан прызначаны сфарміраваць комплекс мер па прыярытэтных напрамках у адпаведнасці з асноўнымі палажэннямі Праграмы сацыяльна-эканамічнага развіцця Беларусі на 2021-2025 гады, уключаючы садзейнічанне дасягненню зялёнага эканамічнага росту ва ўмовах захавання прыроднага капіталу і павышэнне занятасці шляхам стварэння зялёных рабочых месцаў.

Сярод прыярытэтных напрамкаў развіцця зялёнай эканомікі ў Беларусі - укараненне прынцыпаў устойлівага спажывання і вытворчасці, развіццё эканомікі замкнёнага цыкла (цыркулярнай эканомікі), вытворчасці арганічнай прадукцыі, экалагічнага турызму і аграэкатурызму, фарміраванне разумных і энергаэфектыўных гарадоў, развіццё электратранспарту (інфраструктуры) і гарадской мабільнасці. Таксама ў пераліку змякчэнне наступстваў змянення клімату і адаптацыя да кліматычных змяненняў, захаванне і ўстойлівае выкарыстанне біялагічнай і ландшафтнай разнастайнасці, развіццё сферы зялёнага фінансавання, адукацыя, падрыхтоўка кадраў і сацыяльная ўключанасць, навуковае забеспячэнне пераходу да зялёнай эканомікі.

Згодна з планам, асаблівая ўвага павінна ўдзяляцца распрацоўцы галіновых і рэгіянальных стратэгій развіцця, якія даюць магчымасць улічваць як галіновыя асаблівасці, так і сацыяльна-эканамічны стан тэрыторыі, а таксама патрэбнасці насельніцтва, у тым ліку і сацыяльна слабаабароненых груп.

Дакументам вызначаны мерапрыемствы, накіраваныя на рэалізацыю нацплана. У іх ліку развіццё экалагічнай сертыфікацыі і экамаркіроўкі, распрацоўка заканадаўства ў сферы абароту хімічных рэчываў у частцы абмежавання выкарыстання оксапластмас і мікрапластмас, пашырэнне зялёных маркетынгавых стратэгій у галіне ўстойлівай вытворчасці сярод арганізацый Беларусі. У планах таксама распрацоўка і прыняцце стратэгіі развіцця эканомікі замкнёнага цыкла (цыркулярнай эканомікі) Беларусі на перыяд да 2035 года, стварэнне сеткавай інтэрнэт-платформы для інфармавання бізнесу аб лепшай практыцы ў частцы ўкаранення прынцыпаў цыркулярнай эканомікі.

Сярод запланаваных мерапрыемстваў - удасканаленне заканадаўства аб абыходжанні з адходамі, а таксама ў галіне вытворчасці і абароту арганічнай прадукцыі, павышэнне камфортнасці і бяспекі ўмоў пражывання з паступовым пераходам да ландшафтна-сядзібнай урбанізацыі, стварэнне і развіццё сеткі паселішчаў новага тыпу, развіццё сеткі зарадных станцый для электратранспарту, рэалізацыя канцэпцыі развіцця веласіпеднага руху.

У планах таксама - распрацаваць стратэгію доўгатэрміновага развіцця Беларусі з нізкім узроўнем выкідаў парніковых газаў на перыяд да 2050 года, укараніць механізм добраахвотнага экалагічнага страхавання, развіваць сістэму зялёных дзяржаўных закупак.

Чакаецца, што запланаваныя мерапрыемствы будуць рэалізоўвацца ў рамках выканання дзяржпраграм на 2021-2025 гады.

Пастанова ўступае ў сілу пасля яе афіцыйнага апублікавання.

Крынiца: БелТА