Удзельнікі "Крэатыўнага ўзросту" займаліся ёгай, танцавалі зумбу і распавядалі пра сучасны мейкап. За маштабнымі гуляннямі, якія прайшлі напярэдадні Дня пажылога чалавека (адзначаецца 1 кастрычніка), назіралі і карэспандэнты МЛЫН.ВУ.
На імправізаваных пляцоўках разгарнуліся маштабныя гулянні. Там адбыліся іміджавыя майстар-класы, заняткі па скандынаўскай хадзьбе. Гучалі песні, удзельнікі заўзята кружылі ў танцы. А валанцёры Чырвонага Крыжа з Заслаўя прапаноўвалі гасцям свята карысныя і смачныя стравы.
- Частуйцеся, усё натуральнае! Прадукты, якія выкарыстоўваліся пры падрыхтоўцы страў, з асабістых падсобных гаспадарак валанцёраў, - запрашае нас да стала энергічная жанчына ў прыбранай сукенцы - Канстанцыя Шаховіч.
Спрабуем, а яна між тым распавядае:
- На фестывалі я, напэўна, самая ўзроставая. Мне амаль 85 гадоў. 42 гады была педагогам у школе, а цяпер працую ў гісторыка-культурным музеі-запаведніку «Заслаўе». Праводжу экскурсіі, пішу вершы, пішу музыку. Творчасць для мяне — сапраўдная аддушына. Мала хто верыць, што я размяняла дзявяты дзясятак. Лічу, што сакрэт маладосці - у працавітасці, пазітыўным стаўленні да жыцця і фізічнай актыўнасці. З задавальненнем катаюся на ровары і зазіраюся на электрасамакат. Уяўляеце, як зручна будзе на ім дабірацца на працу?
Правільная пастава, лёгкія рухі, усмешка - у свае 71 Дзіна Пятрэнка выглядае як сапраўдная мадэль. Супербабуля свой узрост не хавае, ганарыцца, што ўдзельнічае ў модных дэфіле.
- Наведваю цэнтр актыўнага даўгалецця ў Мінску, а яшчэ рэкламую прадукцыю вытворцаў адзення. Каб падтрымліваць форму, займаюся плаваннем, танцамі, стрэтчынгам. 13 гадоў прапрацавала бухгалтарам, але заўсёды любіла спорт. На пенсіі ў мяне нібы другое дыханне адкрылася. Магчымасцяў падтрымліваць сваю фізічную форму цяпер шмат: спартыўныя цэнтры і групы па інтарэсах. Ня трэба вялікіх фінансавых укладанняў, каб займацца сабой.
Тым часам на спартыўнай пляцоўцы бойкія пенсіянеры наладжваюцца на трэніроўку па скандынаўскай хадзьбе:
- Ідзем лёгка, спакойна, не забываемся правільна дыхаць, — інструктуе аднагодкаў Раіса Сілівестрава, якая прыехала на фестываль з горада Горкі Магілёўскай вобласці.
Прызнаецца, што, калі тры гады таму асвоіла тэхніку скандынаўскай хадзьбы з палкамі, забылася пра таблеткі.
- Раней пакутавала гіпертаніяй, а цяпер у мяне такой праблемы няма. Займаюся скандынаўскай хадзьбой у любое надвор'е: размінаюся, раблю дыхальныя практыкаванні. Спачатку ў нашай групе было ўсяго пяць чалавек, а цяпер — больш за 300. Мы распрацавалі экалагічную сцежку, ездзім на фестывалі і спартыўныя мерапрыемствы. А яшчэ я захапляюся танцамі: вальс, кракавяк, беларуская полька. Чым больш пазітыўных думак - тым больш энергіі. У свае 69 гадоў я хачу радавацца жыццю і натхняць іншых!
Альбіна Пажаева, якой амаль 80, зацікавілася майстар-класам па завязванні шыйнай хусткі.
- Большасць спосабаў я ведаю, але ўсё роўна цікава, - кажа суразмоўца.
Усіх яе захапленняў не пералічыць: валанцёрства, веласпорт, карвінг.
- 52 гады аддала медыцыне, - распавядае лідар валанцёрскай групы Мінскай гарадской арганізацыі Чырвонага Крыжа Альбіна Пажаева. — І пасля выхаду на пенсію жыцце для мяне не спынілася. У 57 гадоў я ўдзельнічала ў маштабным велапрабегу, праехала Беларусь і Германію. Захаплялася спортам нягледзячы на хваробы. Перанесла анкалогію і аперацыю па выдаленні ныркі. Здавалася б, пры такім раскладзе лёгка ўпасці ў дэпрэсію, але я сабе гэтага не дазволіла! Арганізавала танцавальную групу, занялася ёгай, кулінарыяй, пачала хадзіць у турпаходы. Жыву паўнавартасна і радуюся кожнаму дню. Лічу, што ўзрост - гэта не лічбы ў пашпарце, а стан душы.
Як распавяла старшыня грамадскага аб'яднання "Адпачынак у вёсцы" Валерыя Кліцунова, ідэю свята для пажылых падгледзелі ў Шатландыі. Першы фестываль прайшоў у 2018-ым на базе сямі беларускіх аграсядзіб і сабраў каля тысячы ўдзельнікаў. У 2019 годзе арганізатары абнавілі фармат мерапрыемства. Увагу надалі не толькі фізічнай актыўнасці, але і развіццю прадпрымальніцтва.
"Крэатыўны ўзрост" - гэта ідэі для самарэалізацыі, актыўнага ўдзелу ў грамадскім жыцці. Фестываль дапамагае стварыць пазітыўны вобраз сучаснага пажылога чалавека.
- У Мінскай вобласці развіваюцца праекты па прасоўванні здаровага старэння. У іх задзейнічаны адразу некалькі раёнаў: Вілейскі, Уздзенскі, Маладзечанскі і іншыя, — распавядае спецыяліст па працы з супольнасцямі аддзела медыка-сацыяльнай работы БТЧК Аляксандра Калесніковіч. - Праекты дапамагаюць даведацца пра здаровае харчаванне, спрыяюць прафілактыцы неінфекцыйных захворванняў, заняткаў спортам. Удзяляем шмат увагі арганізацыі вольнага часу пажылых людзей. Стараемся далучаць у валанцёрскую дзейнасць тых, хто вядзе менш актыўны лад жыцця.
— Пажылыя людзі, якія займаюцца валанцёрствам — гэта нашы надзейныя памочнікі, — адзначае намеснік начальніка аддзела медыка-сацыяльнай працы БТЧК Таццяна Святловіч. — За ўвесь час у Беларусі створана 90 ініцыятыўных груп, у якіх прынялі ўдзел больш за 1200 чалавек. Яны працавалі не толькі ў вялікіх гарадах, але і ў вёсках. Дзейнасць з людзьмі сталага ўзросту пастаянна набывае розныя формы. З 2014 года ўкаранялі праграму па прафілактыцы неінфекцыйных захворванняў і прасоўванні ЗЛЖ. Фестываль "Крэатыўны ўзрост" даказвае, што пажылыя таленавіты ў многіх сферах.