Штогод у майскія дні валанцёры і спецыялісты Смалявіцкай раённай арганізацыі БТЧК віншуюць удзельнікаў Вялікай Айчыннай вайны са святам Перамогі. Сёлета ў рамках правядзення месячніка Чырвонага Крыжа старшыня раённай арганізацыі Галіна Мікалаеўна Графутка павіншавала са святам удзельнікаў вайны з 9 мая і ўручыла ім прадуктовыя наборы.
Віншаванне і ўручэнне набораў праходзіла ў кранальнай атмасферы. Нягледзячы на сталы ўзрост, заслужаныя смалявічане, якія прымалі віншаванні, трымаліся бадзёра, успаміналі ваенныя гады, распавядалі, што ім давялося перажыць у ваеннае ліхалецце. Усе без выключэння дзякавалі Чырвоны Крыж за ўвагу і падтрымку.
Сярод тых, у каго пабывалі прадстаўнікі Чырвонага Крыжа, - Анастасія Уладзіміраўна Вершаль. З верасня 1943 года па сакавік 1944 года разам з бацькамі яна знаходзілася ў атрадзе імя "Калініна" брыгады "Смерць фашызму". Удзельнічала ў вызваленні Бягомля і Юр'ева. Анастасія Уладзіміраўна ўзнагароджана Ордэнам Айчыннай вайны 3 ступені.
Яна распавяла, што пасля вайны скончыла курсы бухгалтараў і працавала ў спецдэтдоме горада Смалявічы. Анастасія Уладзіміраўна ўспомніла той складаны час, калі прыводзілі дзяцей галоднымі, дрэнна апранутых. Даводзілася быць з імі ўвесь час, сыходзіла дадому толькі позна ўвечары. Затым яна працавала ў райзаготканторы і ў дарожна-эксплуатацыйным кіраванні.
Разам з мужам Анастасія Уладзіміраўна выхавала чатырох дзяцей, сёння ў яе дзевяць унукаў і чатыры праўнукі. Яна і сёння прымае актыўны ўдзел на ўрачыстых мерапрыемствах, якія праводзяцца Саветам ветэранаў.
Як і астатнія падапечныя Чырвонага Крыжа, Анастасія Уладзіміраўна Вершаль сардэчна падзякавала прадстаўнікоў арганізацыі за ўвагу і клопат.