Місія Еўрапейскай групы рэгулюючых органаў ядзернай бяспекі (ENSREG) у Беларусь плануецца ў маі-чэрвені гэтага года, паведамілі БЕЛТА ў Дэпартаменце па ядзернай і радыяцыйнай бяспецы МНС (Дзяржатамнагляд).
Эксперты ENSREG 9-10 лютага наведалі Беларускую АЭС з двухдзённым візітам у рамках партнёрскага агляду Нацыянальнага плана дзеянняў па выніках правядзення стрэс-тэстаў БелАЭС. Па выніках візіту і папярэдніх мерапрыемстваў эксперты ENSREG падрыхтуюць папярэднюю версію справаздачы аб партнёрскім аглядзе. Дадаткова да праведзенага тэхнічнага візіту запланавана таксама правядзенне місіі ENSREG у Беларусь на 1,5 тыдня арыенціровачна ў маі - чэрвені 2021 года. Яе тэрміны будуць вызначаны дадаткова з улікам паляпшэння эпідэміялагічнай сітуацыі. Пасля завяршэння гэтай місіі будзе падрыхтавана канчатковая версія справаздачы ENSREG аб партнёрскім аглядзе нацыянальнага плана, які прадставяць для СМІ і грамадскасці.
Падчас візіту 9-10 лютага еўрапейскім экспертам прадэманстраваны аб'екты, сістэмы і абсталяванне Беларускай АЭС, важныя з пункту гледжання ўстойлівасці станцыі да знешніх прыродных уздзеянняў і выканання нацыянальнага плана. Прадастаўлена магчымасць вывучыць адпаведную дакументацыю, правесці абмеркаванне сваіх назіранняў адносна рэалізацыі нацплана і ўліку рэкамендацый ENSREG з прадстаўнікамі Дзяржатамнагляду, ДП "Беларуская АЭС", праектнага блока АТ ІК "АБЭ", іншымі зацікаўленымі.
Стрэс-тэсты Беларускай АЭС былі праведзены ў 2016-2018 гадах. Яны ўключалі тры этапы: самаацэнку Беларускай АЭС, нацыянальную ацэнку і партнёрскую праверку ENSREG. Нацыянальны план быў сфарміраваны з улікам вынікаў усіх трох этапаў. У 2020 годзе Беларусь выказала гатоўнасць правесці партнёрскі агляд ENSREG адносна нацыянальнага плана. Да моманту візіту ўжо выкананы шэраг мерапрыемстваў партнёрскага агляду. Нацыянальны план разгледжаны экспертамі ENSREG, якія сфарміравалі 150 пытанняў да яго. 95 пытанняў таксама паступілі ад Аўстрыі і Літвы. Беларускі бок падрыхтаваў і накіраваў у ENSREG адказы. Адбыўся шэраг экспертных кансультацый у фармаце відэа-канферэнц-сувязі.
