Несумненна, тушыць пажары павінны ратавальнікі. Аднак у большасці сваёй амаль любое своечасова выяўленае загаранне можна ліквідаваць на пачатковай стадыі і нават без дапамогі спецыяльнага абсталявання, а пры дапамозе першасных сродкаў пажаратушэння.
З малых гадоў мы ведаем, што такія сродкі - гэта вада, зямля, пясок, шчыльная тканіна і вогнетушыцелі. Таксама з малых гадоў мы памятаем, што найбольш эфектыўны з гэтага спісу - вогнетушыцель. Успамінаем, як ім карыстацца і што рабіць пры пажары ў дадзеным матэрыяле.
Кожны чалавек павінен ведаць, як уладкованы і дзейнічае вогнетушыцель. Ён здольны не толькі ў самы кароткі час патушыць загаранне, але і дае нам магчымасць прадухіліць распаўсюджванне полымя і захаваць сваю маёмасць.
Адзін з такіх выпадкаў адбыўся ў лістападзе 2019 года на прадпрыемстве ТАА "Маркет Майстар", што знаходзіцца ў Смалявіцкім раёне. Гэтая арганізацыя спецыялізуецца на абсмажваннi семак, арэхаў, а таксама на іх фасоўцы. У прыборы, прызначаным для сушкі арэхаў, адбылося загаранне, але работнікі прадпрыемства не разгубіліся і дзейнічалі паводле інструкцыі - прынялі дзеянні па тушэнні загарання, скарыстаўшыся вогнетушыцелем. Дзякуючы гэтаму, полымя не выйшла за межы абсталявання і не нанесла значнай шкоды самому прадпрыемству.
Але вернемся да самога вогнетушыцеля. На іх корпусе налеплена этыкетка з інфармацыяй пра тое, як выкарыстоўваць гэты канкрэтны вогнетушыцель. Раім вам прачытаць яе загадзя.
Там вы знойдзеце, якія класы пажараў можна тушыць з дапамогай вогнетушыцеля, як даўно ён перазараджваўся, а таксама як прывесці яго ў дзеянне. Для гэтага неабходна сарваць пломбу, выдраць чэку, накіраваць раструб на ачаг узгарання і націснуць на рычаг.
Варта памятаць, што вогнетушыцель пры тушэнні трэба трымаць вертыкальна, а захоўваць яго лепш удалечыні ад ацяпляльных прыбораў і прамых сонечных прамянёў.
Але лепш вогнетушыцеля абароніць ад пажару толькі выкананне правіл пажарнай бяспекі. Будзьце ўважлівыя і пільныя – не захоўвайце ў даступных для дзяцей месцах запалкі і запальніцы, прыбярыце ад пліты гаручыя прадметы, усталюйце ў доме аўтаномны пажарны апавяшчальнік.
Вось яшчэ некаторыя парады. Не перагружайце электрасеткі - запомніце правіла "адна разетка - адзін электрапрыбор", не пакідайце без нагляду на пліце ежу, якая рыхтуецца, а таксама не карыстайцеся няспраўным электраабсталяваннем.
Калі ж у вашым домаўладанні ўсё ж адбыўся пажар, памятаеце, што любыя рэчы можна купіць, а вось жыццё і здароўе не вернеш. Не рызыкуйце ў барацьбе з агнём - калі вы думаеце, што вы ці ваш вогнетушыцель не справіцца з полымем, пакіньце памяшканне і выклічце ратавальнікаў.