Кітай выдзеліць $235 млн на будаўніцтва ў Мінску нацыянальнага футбольнага стадыёна і басейна міжнароднага стандарту, паведаміў журналістам міністр эканомікі Дзмітрый Крутой, паведамляе карэспандэнт БЕЛТА.
"Па двух нашых будучых спартыўных аб'ектах кітайскім бокам зарэзервавана $235 млн, - сказаў Дзмітрый Крутой. - Кітай лічыць, што гэтыя аб'екты будуць яго тварам у Еўропе, таму яны вельмі сур'ёзна да іх ставяцца. Гэта будуць сапраўды знакавыя спартыўныя збудаванні, аналагаў якім не вельмі шмат у нашым рэгіёне".
Паводле слоў міністра, Кітай пачаў аказваць тэхнічную дапамогу Беларусі ў 2007 годзе. За 12 гадоў было рэалізавана восем праектаў агульным коштам амаль $130 млн. "Сёння ў рабоце акцэптованыя сумы на $95 млн, гэта значыць сумарна за 12 гадоў мы забяспечылі выбарку агульнай кітайскай тэхдапамогі на $225 млн, - адзначыў ён. - Каб зразумець маштабы: за 12 гадоў практычна ідэнтычная сума, якая будзе выкарыстана на двух аб'ектах. Сумарна гэта паўмільярда долараў".
На будаўніцтве футбольнага стадыёна і басейна кітайская тэхдапамога для Беларусі не закончыцца. КНР ужо запланавала фінансавую падтрымку на суму каля $100 млн.
"З мінулага года ў Кітаі змянілася ўнутраная палітыка адносна тэхдапамогі. Было створана спецыяльнае дзяржаўнае агенцтва, яно падпарадкоўваецца непасрэдна Дзяржсавету і з такімі краінамі, як наша, узаемадзейнічае ў рамках заключаных міжурадавых пагадненняў. Літаральна гэтымі днямі мы атрымалі падпісаны мемарандум, дзе дакладна вызначаны прыярытэты для нашай рэспублікі. Акрамя гэтых спартыўных збудаванняў прадугледжаны аб'ёмы тэхнічнай дапамогі, якая будзе выдзяляцца індустрыяльнаму парку "Вялікі камень", мытнаму і пагранічнаму камітэтам, на трэці этап будаўніцтва сацыяльнага жылля ў Беларусі і іншыя напрамкі", - расказаў Дзмітрый Крутой.
