Беларусь і Куба рэалізуюць сумесны праект у галіне біятэхналогій па распрацоўцы прэпаратаў для аховы сельскагаспадарчых пасеваў. Цяпер праходзяць даследаванні вучоных дзвюх краін. У наступным годзе яны плануюць выпусціць прэпарат на рынак. Аб гэтым расказаў журналістам старшыня Дзяржаўнага камітэта па навуцы і тэхналогіях Аляксандр Шумілін, перадае карэспандэнт БЕЛТА.
З беларускага боку ўдзельнічае Інстытут мікрабіялогіі Нацыянальнай акадэміі навук, з кубінскага - буйнейшая біятэхналагічная дзяржкарпарацыя "Біякубафарма".
Паводле слоў Аляксандра Шуміліна, пакуль праекты ў навукова-тэхнічнай сферы паміж дзвюма краінамі адзінкавыя. "Але ёсць жаданне як у нашых, так і ў кубінскіх вучоных працаваць разам і ствараць новы прадукт, - дадаў старшыня ДКНТ. - Нягледзячы на ўсе санкцыі, яны шмат рэсурсаў укладваюць у развіццё навукі, добра разумеючы, што немагчыма развіваць эканоміку без навукі. Кубінцаў цікавяць нашы тэхналогіі ў аграрным сектары, машынабудаванні, распрацоўцы новых матэрыялаў. Нас цікавяць іх распрацоўкі ў галіне медыцыны, лячэння ракавых захворванняў і стварэння новых лякарстваў. Калі мы часта сінтэзуем лекавыя формулы, то ў кубінцаў шмат лякарстваў ад раку на аснове выцяжак з прыродных матэрыялаў".
Тое, што кубінская медыцына ў галіне лячэння ракавых захворванняў лічыцца адной з самых моцных у свеце, пацвярджае і міністр аховы здароўя Уладзімір Каранік. "Там ёсць цікавыя напрацоўкі, прэпараты, якія цяпер даволі паспяхова прымяняюцца ў анкалогіі, а таксама для лячэння цукровага дыябету, - канстатаваў ён. - Ёсць напрацоўкі кубінскіх вучоных, якія мы спадзяёмся сумеснымі намаганнямі вывесці на этап клінічных выпрабаванняў і прымяняць у нашых пацыентаў".
"Пакуль рашэнне яшчэ не прынята, таму даць назвы канкрэтных прэпаратаў я не магу, але размова ідзе аб даволі інавацыйных сродках", - дадаў міністр.
