На днях у Чэрвені адбылася цырымонія адкрыцця кацельні на мясцовых відах паліва, а менавіта на шчэпках.
Нагадаем, будаўніцтва вялося па праекце Міжнароднага банка рэканструкцыі і развіцця "Выкарыстанне драўнянай біямасы для цэнтралізаванага цеплазабеспячэння". У будынку ўсталяваны тры вадагрэйныя катлаагрэгата на шчэпках (з механізаванай падачай) і два газавыя катлы. У тым ліку мадэрнізаваны індывідуальныя цеплавыя пункты з устаноўкай аўтаматычнага рэгулявання і заменены старыя трубаправоды.
Кацельня забяспечвае цяплом жылыя дамы, будынкі сацыяльнага прызначэння, а таксама прадпрыемствы горада.
Паводле інфармацыі Дэпартамента па энергаэфектыўнасці Дзяржстандарту, кацельня дазволіць павялічыць выкарыстанне мясцовых паліўна-энергетычных рэсурсаў больш чым на 4,2 тыс. тон умоўнага паліва ў год, інакш кажучы штогадовая эканомія для дзяржавы складзе каля 3,2 млн. м3 імпартаванага прыроднага газу.
Дарэчы, на дадзены момант у рэгіёне па дзяржпраграме "Энергазберажэнне" ужо ўведзена ў эксплуатацыю 4 цеплакрыніцы на мясцовых відах паліва з 6 запланаваных.