Міністэрства архітэктуры і будаўніцтва разлічвае ў 2019-2020 гадах забяспечыць жыллём шматдзетныя сем'і, якія больш як адзін год не накіроўваліся на будаўніцтва. Аб гэтым у эфіры тэлеканала "Беларусь 1" заявіў кіраўнік профільнага ведамства Дзмітрый Мікулёнак, паведамляе БЕЛТА.
"Мы разлічваем за 2019-2020 гады закрыць вострую патрэбнасць (у жыллі для шматдзетных. - Заўвага БЕЛТА). Гэта тыя сем'і, якія больш як адзін год не накіроўваліся на будаўніцтва жылля. Будзе штомесячны кантроль. Задача - забяспечыць жыллём 12 тыс. сем'яў за бягучы і наступны гады. Вырашыўшы гэту задачу, у 2021 годзе мы выйдзем стабільна на забеспячэнне напрамку на працягу года", - праінфармаваў міністр.
Дзмітрый Мікулёнак расказаў аб планах па будаўніцтве арэнднага жылля. Згодна з Дырэктывай (Дырэктыва нумар 8 "Аб прыярытэтных напрамках развіцця будаўнічай галіны". - Заўвага БЕЛТА) у Беларусі штогод будзе будавацца 135 тыс. кв.м. Паводле яго слоў, ёсць два складнікі будаўніцтва такога жылля. Першы - арэнднае жыллё камерцыйнага выкарыстання, якое будуецца за кошт бюджэту і разлічана для замацавання спецыялістаў на месцах. Другі напрамак - будаўніцтва такога жылля арганізацыямі. "Наша задача цяпер - прастымуляваць арганізацыі, каб яны ў рамках замацавання спецыялістаў, няхватка якіх назіраецца ў абласцях і раёнах, будавалі жыллё. Гэта можа быць і катэдж, і шматпавярховая забудова. Прапановы такія мы цяпер прадумваем аж да падатковых паслабленняў для тых, хто будуе . Калі мы эканамічна не прастымулюем, укладваць у жыллё абаротныя сродкі, якіх і так дэфіцыт, ні адно прадпрыемства не стане", - адзначыў міністр.
Рашэнні, выкладзеныя ў Дырэктыве, будуць таксама садзейнічаць развіццю гарадоў-спадарожнікаў. Кіраўнік ведамства праінфармаваў, што цяпер развіваюцца ў асноўным спадарожнікі Мінска, Брэста і Гродна. Але пакуль, акрамя жылля, ім прапанаваць няма чаго. "Трэба перафармаціраваць планы, плюс усё ж такі рабіць акцэнт не на шматпавярховую забудову, - дадаў Дзмітрый Мікулёнак. - Маё глыбокае перакананне: у гарады-спадарожнікі шматпавярховай забудовай мы людзей не завабім". Паводле яго слоў, да канца 2020 года ў Рудзенску, Скідзелі і Жабінцы можна будзе ўжо нешта паказаць.
Гаворачы аб распрацоўцы законапраектаў у развіццё Дырэктывы, міністр падкрэсліў, што стаіць адна задача: павінна быць створана адзіная кніга, зазірнуўшы ў якую можна атрымаць адказы на ўсе пытанні. "Вось гэту кнігу і павінна зрабіць наша міністэрства. Будаўнічыя нормы і правілы будуць гатовы ўжо ў гэтым годзе, у другім паўгоддзі з'явяцца асноўныя дакументы, якія датычацца бяспекі будынкаў і збудаванняў. На працягу 2020 года і наступных гадоў будзе ісці перапрацоўка новых норм і правіл - гэта бесперапынны працэс. Але асноўны звод разлічваем атрымаць на працягу бягучага і будучага года", - расказаў Дзмітрый Мікулёнак.
Закрануў міністр і пытанне кадравага забеспячэння галіны. Паколькі пачынаецца будаўнічы сезон, абстаноўка цяпер даволі напружаная. "Але мы папярэдзілі сітуацыю: нарматыўныя дакументы, якія дазваляюць падняць заработную плату, пералічыўшы таксама каштарысную частку аб'ектаў, у заказчыкаў з'явіліся. Цяпер неабходна кожнаму на месцах ацаніць сітуацыю з кадрамі. Калі ёсць патрэбнасць і кадры, што называецца, могуць "прагаласаваць нагамі", значыць, неабходна хутка прымаць рашэнні, таму што стымулюючыя моманты, якія мы прадугледзелі, дазваляюць выраўнаваць узровень заработнай платы з сумежнымі дзяржавамі, асабліва па высокакваліфікаваных прафесіях. Усе рычагі для гэтага цяпер ёсць", - падкрэсліў кіраўнік ведамства.
