Пляцоўкі па кампаставанні арганічных адходаў з'явяцца да канца года ва ўсіх абласцях Беларусі, паведаміла ў інтэрв'ю карэспандэнту БЕЛТА дырэктар ДУ "Аператар другасных матэрыяльных рэсурсаў" Наталля Грынцэвіч.
"Акрамя прамога рэцыклінгу ёсць такі метад, як кампаставанне харчовых і іншых арганічных адходаў, лісця. Ён шырока прымяняецца ў свеце, а ў нас толькі пачынае ўкараняцца. Такія пляцоўкі ўжо створаны ў Гомелі, Слоніме і Мінскім раёне, а да канца года з'явяцца ў кожнай вобласці", - адзначыла Наталля Грынцэвіч.
Цяпер на перапрацоўку накіроўваюцца папера, кардон, шклабой, палімеры, зношаныя шыны, электрычнае электроннае абсталяванне, адпрацаванае масла. Да канца года ў рэспубліцы таксама пачнуць перапрацоўваць каробкі ад соку.
За апошнія шэсць гадоў у Беларусі створана 40 ліній сартавання камунальных адходаў. Уведзены ў эксплуатацыю смеццесартавальныя заводы ў Гродне і Мінску, у мінулым годзе пачалося будаўніцтва такога прадпрыемства ў Віцебску. З выкарыстаннем сродкаў ДУ "Аператара другасных матэрыяльных рэсурсаў" арганізавана перапрацоўка забруджаных палімераў на прадпрыемствах "Белдругаспалімер" (Гродна), "Барысаўскі завод пластмасавых вырабаў". Запушчана лінія па перапрацоўцы забруджанай пэт-бутэлькі на "Біямехзаводзе бытавых другасных рэсурсаў" у Наваполацку. На Брэсцкім смеццеперапрацоўчым заводзе ўстаноўлена лінія па сартаванні адходаў пластмас. На прадпрыемстве "Гомельхімгандаль" арганізавана вытворчасць па перапрацоўцы зношаных шын. Створана адзіная ў рэспубліцы вытворчасць па перапрацоўцы элементаў харчавання, мадэрнізавана лінія па перапрацоўцы макулатуры на кардонна-папяровым заводзе ў Слоніме, аналагічны праект рэалізуецца на папяровай фабрыцы "Спартак".
Усяго ў год у краіне ўтвараецца каля 3,8 млн т ЦКА, з іх пятая частка ўключаецца ў абарот. Аб'ёмы збору другасных рэсурсаў павялічваюцца з 2010 года. У 2018 годзе паказчык вырас у 2,1 раза - з 338,7 тыс. т да 714,3 тыс. т, цяпер на аднаго гарадскога жыхара прыпадае 96,4 кг другаснай сыравіны.
