Падпісанне дагавораў аб рэзідэнцтве і пагадненняў аб намерах па маштабных праектах плануецца ў рамках форуму па рэгіянальным супрацоўніцтве і развіцці ў рамках ініцыятывы "Пояс і шлях" 1-3 ліпеня ў індустрыяльным парку "Вялікі камень". Аб гэтым у эфіры тэлеканала СТБ паведаміў першы намеснік генеральнага дырэктара СЗАТ "Кампанія па развіцці індустрыяльнага парка" Кірыл Карацееў, паведамляе БЕЛТА.
"Мы плануем падпісаць дагаворы аб рэзідэнцтве і пагадненні аб намерах розных вялікіх праектаў. У іх ліку знакавыя праекты па вытворчасці рухавікоў для легкавых аўтамабіляў, па суднабудаванні. Адзін з маштабных праектаў, пра які мы даўно гаварылі і па якім павінна адбыцца на палях форуму падпісанне ўстаноўчых дакументаў, - гэта стварэнне сумеснай кампаніі - аператара будучага чыгуначнага мультымадальнага тэрмінала", - расказаў Кірыл Карацееў.
Гэтым самым фактычна будзе дадзены старт пачатку рэалізацыі праекта па будаўніцтве тэрмінала, вакол якога, як мяркуецца, аб'яднаюцца вядучыя еўрапейскія і азіяцкія лагістычныя кампаніі. "Гэта будзе чарговым канкрэтным крокам па рэалізацыі канцэпцыі новага Шаўковага шляху, каб індустрыяльны парк быў не проста транзітным калідорам, па якім праходзяць з Азіі ў Еўропу і назад паязды, але каб мы тут генерыравалі паток, стваралі яго і накіроўвалі ў Азію і Еўропу", - сказаў першы намеснік гендырэктара.
Кірыл Карацееў адзначыў, што на сённяшні дзень аб'ём заяўленых інвестыцый у праекты ў "Вялікім камені" перавышае $1 млрд, асвоена $470 млн.
Гаворачы аб рэзідэнтах індустрыяльнага парка, ён адзначыў, што сярод іх прадпрыемствы 5-6-га ўкладаў. "Але важна разумець, што і без прадпрыемстваў таго ж 4-га ўкладу не можа развівацца эканоміка і індустрыяльны парк. У любым выпадку мэта - пабудова высокатэхналагічных вытворчасцей. Асновай для гэтага павінна стаць адпаведная інфраструктура. Спачатку мы гаварылі аб інжынернай інфраструктуры, стварылі яе, з'явіліся пэўныя вытворчасці. Цяпер мы будуем інавацыйныя цэнтры, ствараем ужо фінансавую інфраструктуру, венчурную, каб яна падтрымлівала тыя стартапы, тыя прыкладныя навукаёмістыя праекты, якія і ствараюць аснову вытворчасці заўтрашняга-паслязаўтрашняга дня", - падкрэсліў Кірыл Карацееў.
Форум па рэгіянальным супрацоўніцтве і развіцці ў рамках ініцыятывы "Пояс і шлях" пройдзе ў Кітайска-беларускім індустрыяльным парку "Вялікі камень" 2 ліпеня. Яго галоўная тэма - "Адкрыты парк "Вялікі камень" - прыклад глабальных магчымасцей". Мерапрыемства збярэ каля 500 удзельнікаў з 20 краін. Гэта прадстаўнікі ўрадаў, кіраўнікі бізнес-асацыяцый, інвестыцыйных фондаў, банкаў, а таксама вядомых кампаній з краін Еўрапейскага і Азіяцкага рэгіёнаў. Арганізатары форуму - Міністэрства эканомікі Беларусі і Міністэрства камерцыі Кітайскай Народнай Рэспублікі. Суарганізатарамі выступаюць Беларуская гандлёва-прамысловая палата, Бюро па садзейнічанні знешняму гандлю пры Міністэрстве камерцыі КНР, адміністрацыя індустрыяльнага парка "Вялікі камень", Нацыянальнае агенцтва інвестыцый і прыватызацыі, СЗАТ "Кампанія па развіцці індустрыяльнага парка".
Кітайска-беларускі індустрыяльны парк "Вялікі камень" з'яўляецца міжнароднай пляцоўкай для стварэння высокатэхналагічных вытворчасцей у перадавых сферах дзейнасці з прымяненнем беспрэцэдэнтных ільгот і прэферэнцый. У парку зарэгістраваны 44 кампаніі з КНР, Беларусі, Аўстрыі, Германіі, Расіі, Літвы, ЗША, Ізраіля.
