Першы энергаблок БелАЭС з моманту ўключэння ў аб'яднаную энергасістэму ў лістападзе 2020 года выпрацаваў 4,6 млрд кВт.гадз электраэнергіі. Аб гэтым паведаміў міністр энергетыкі Віктар Каранкевіч у эфіры "Беларусь 1", паведамляе БЕЛТА.
"Агульны аб'ём вытворчасці электрычнай энергіі склаў 4,6 млрд кВт.гадз. Гэта дало магчымасць замясціць каля 1,3 млрд куб.м прыроднага газу. Штодзённа на атамнай электрастанцыі вырабляецца 28 млн кВт.гадз электраэнергіі - гэта прыкладна 25 працэнтаў ад агульнага аб'ёму вытворчасці электрычнай энергіі ў краіне, - расказаў Віктар Каранкевіч. - З улікам уводу ў эксплуатацыю другога энергаблока, або станцыі ў цэлым, агульны аб'ём вытворчасці электрычнай энергіі складзе каля 18,5 млрд кВт.гадз у год з тэрмінам эксплуатацыі 60 гадоў з магчымасцю яго прадаўжэння да 100 гадоў з улікам існуючай практыкі прадаўжэння работы рэактарных установак".
Міністр нагадаў, што другі энергаблок будзе ўведзены ў прамысловую эксплуатацыю ў 2022 годзе. "Да канца гэтага года плануецца перайсці да этапу так званага фізічнага пуску - гэта загрузка свежага ядзернага паліва ў актыўную зону рэактара на другім энергаблоку", - адзначыў ён.
Віктар Каранкевіч дадаў, што на сённяшні дзень у свеце функцыянуе 445 блокаў атамных электрастанцый. "51 блок знаходзіцца ў стадыі будаўніцтва. Ёсць прагнозы МАГАТЭ, што доля вытворчасці электрычнай энергіі на атамных электрастанцыях можа павялічыцца да 2050 года ў 2 разы і дасягнуць узроўню 12 працэнтаў пры цяперашніх 6 працэнтах", - удакладніў міністр.
Крынiца: БелТА
