На мінулым тыдні ў культурным жыцці Смалявічаў адбылася сапраўдная падзея: на сцэне гарадскога Дома культуры выступіў Нацыянальны акадэмічны народны хор Рэспублікі Беларусь імя Г. І. Цітовіча-адзін з вядучых у Беларусі творчых калектываў.
Яго саліст - Уладзіслаў Качан - наш зямляк. А таму сустрэча была асабліва цёплай. У зале практычна не было свабодных месцаў. Кожны нумар смалявічане сустракалі бурнымі авацыямі, а за асабліва ўпадабаныя выступленні артыстаў дзякавалі кветкамі і гучным «Брава!»
У рэпертуары калектыву больш за паўсотні канцэртных нумароў. Акрамя беларускіх народных песень і танцаў, рэпертуар уключае ўзоры музычнага фальклору іншых народаў, сучасныя творы, створаныя беларускімі паэтамі, кампазітарамі, а таксама творы аўтараў многіх краін постсавецкай прасторы. На рахунку народнага хору некалькі тысяч выступленняў, якія праходзілі ва ўсіх рэгіёнах Беларусі і за мяжой. На сусветнай гастрольнай карце калектыву такія краіны, як Чэхія, Славакія, Канада, Кітай, Манака.
Напружаная праца, пастаянны творчы пошук і нязменная Прага дарог, дзе гастрольныя паездкі ідуць паралельна з фальклорнымі экспедыцыямі — такія будні і свята Нацыянальнага акадэмічнага народнага хору Рэспублікі Беларусь імя Г. І. Цітовіча.
Крыніца: Край Смалявiцкi
