Міжнародная навукова-практычная канферэнцыя "ІІ Еўрапейскія гульні - 2019: псіхолага-педагагічныя і медыка-біялагічныя аспекты падрыхтоўкі спартсменаў" стартавала сёння ў Мінску, перадае карэспандэнт БЕЛТА.
Канферэнцыя пачалася пленарным пасяджэннем у Нацыянальным алімпійскім камітэце Беларусі. "Спорт і навука неаддзельныя адно ад аднаго ў сучасным грамадстве. На канферэнцыі будуць абмеркаваны сістэмы спартыўнага адбору, падрыхтоўкі атлетаў і трэнераў, сучасныя тэхналогіі псіхалагічнага і медыцынскага суправаджэння", - адзначыў міністр спорту і турызму Сяргей Кавальчук.
Удзел у мерапрыемстве прынялі міністр адукацыі Ігар Карпенка, старшыня Каардынацыйнай камісіі ІІ Еўрапейскіх гульняў Спірас Капралас і рэктар БДУФК Сяргей Рэпкін. Работа канферэнцыі прадоўжыцца ў БДУФК і завершыцца 5 красавіка.
На пленарным пасяджэнні падпісаны таксама дагавор аб стварэнні на базе БДУФК сумеснага з БНТУ навукова-адукацыйнага кластара "Інтэлектуальныя тэхналогіі ў спорце".
"Ужо ў бягучым годзе на базе БДУФК адкрыецца цэнтр тэсціравання з унікальным абсталяваннем, які дасць магчымасць прымяніць сучасныя бесправадныя тэхналогіі, методыкі ацэнкі тэхнічнага і фізічнага патэнцыялу атлетаў. Першы год мы плануем сканцэнтравацца на некалькіх цыклічных і гульнявых відах спорту. У прыватнасці, гаворка ідзе аб плаванні, цяжкай і лёгкай атлетыцы, фрыстайле, акрабатыцы, футболе, валейболе і хакеі", - расказаў Сяргей Рэпкін.
У канферэнцыі прымуць удзел больш за 200 вучоных, прадстаўнікоў вышэйшых навучальных устаноў, спартыўных школ і арганізацый, федэрацый па відах спорту з Беларусі, Расіі, Украіны, Арменіі, Узбекістана, Літвы, Польшчы і Аб'яднаных Арабскіх Эміратаў.
Арганізатарамі мерапрыемства з'яўляюцца Міністэрства спорту і турызму Беларусі, Нацыянальны алімпійскі камітэт, Беларускі дзяржаўны ўніверсітэт фізічнай культуры, фонд "Дырэкцыя ІІ Еўрапейскіх гульняў 2019 года".
