За чатыры гады колькасць рэзідэнтаў Кітайска-беларускага індустрыяльнага парка "Вялікі камень" перасягнула чатыры дзясяткі, за пару гадоў гэту лічбу плануюць павялічыць як мінімум удвая. Такая інфармацыя была агучана ў эфіры тэлеканала "Беларусь 1", паведамляе БЕЛТА.
Як адзначыў кіраўнік адміністрацыі парка Аляксандр Ярашэнка: "Галоўнае - каб яны пачалі актыўна функцыянаваць. Нехта з іх цяпер у праектаванні будаўніцтва, нехта - ужо ў выпуску прадукцыі. Некалькі заводаў ажыццявілі пробны выпуск прадукцыі". Такіх прадпрыемстваў - тры. У іх ліку ТАА "Чэнду Сіньджу Шаўковы Шлях Развіццё", якое адкрыла ў "Вялікім камені" завод па выпуску суперкандэнсатараў.
Пасля ўводу ў работу прадпрыемстваў, якія ўжо размясціліся на тэрыторыі, будзе створана больш за 4 тыс. высокапрадукцыйных рабочых месцаў.
Да 2021 года парк плануе завяршыць першы этап асваення зямлі, а гэта 850 га. Да гэтага часу будуць гатовы ўсе інфраструктурныя элементы. Сёння для камфорту супрацоўнікаў узводзіцца жылы квартал з усёй неабходнай інфраструктурай. Першы дом на 156 кватэр плануюць здаць ужо летам.
Усяго з пачатку будаўніцтва парка на яго развіццё прыцягнута больш за $1 млрд інвестыцый.
