Аўстрыйскі канцэрн A1 Telekom Austria Group зацікаўлены ва ўмацаванні супрацоўніцтва з Беларуссю і падрыхтаваў свае прапановы па развіцці сувязі і інфармацыйна-камунікацыйных тэхналогій, заявіў выканаўчы дырэктар канцэрна Томас Арнольднер сёння на сустрэчы з першым намеснікам прэм'ер-міністра Аляксандрам Турчыным у Савеце Міністраў, перадае карэспандэнт БЕЛТА.
Томас Арнольднер расказаў аб асноўных напрамках работы Telekom Austria Group, даччынай кампаніяй якога з'яўляецца беларускі аператар velcom, і прадставіў планы па далейшым пашырэнні бізнесу. Ён адзначыў важнасць беларускага рынку для канцэрна і яго прывабнасць. "Працуючы тут, бачым, як развіваецца краіна ў цэлым і сфера ІКТ, як наш вопыт можна выкарыстоўваць", - сказаў Томас Арнольднер.
Аляксандр Турчын падкрэсліў, што Беларусь задаволена супрацоўніцтвам з канцэрнам, кампанія velcom паказвае добрыя рэзультаты. "Я гатовы выслухаць прапановы, якія ёсць па развіцці кампаніі ў нас у краіне. Мы абмяняемся думкамі і па магчымасці прымем канчатковае рашэнне па абмеркаваных пытаннях", - адзначыў ён.
У канцэрне заяўляюць аб намеры ўдзельнічаць у развіцці сеткі 4G на ўсёй тэрыторыі краіны, у тым ліку сумесна з інфраструктурным аператарам, паколькі цяперашні ахоп не заўсёды задавольвае абанентаў.
Telekom Austria Group - адзін з буйнейшых правайдараў тэлекамунікацыйных паслуг у краінах Цэнтральнай і Усходняй Еўропы. Працуе ў Аўстрыі, Беларусі, Балгарыі, Харватыі, Славеніі, Сербіі і Македоніі. У 2007 годзе Telekom Austria Group набыў 70 працэнтаў акцый беларускага аператара velcom, у 2010 годзе - астатнія 30 працэнтаў. На 1 студзеня 2019 года кліенцкая база velcom налічвае амаль 4,9 млн абанентаў.
