З надыходзячым святам - Днём абаронцаў Айчыны - павіншавалі пастаяльцаў аддзялення кругласутачнага знаходжання для грамадзян пажылога ўзросту і інвалідаў у в.Жажалка валанцёры атрада "Добрае сэрца" Смалявіцкай раённай арганізацыі БТЧК.
Валанцёры з сярэдняй школы №2 - частыя госці ў аддзяленні. Яны прыязджаюць да пажылых людзей пры любым зручным выпадку, каб павіншаваць іх са святам, паднесці невялікія падарункі, ды і проста пагутарыць. Гэтым разам валанцёры падрыхтавалі для іх канцэртную праграму: з вершамі, песнямі і танцамі. Калі хтосьці па стане здароўя не змог выйсці і ўбачыць усё гэта дзейства на свае вочы, да таго рабяты зайшлі ў палату і ўжо там павіншавалі з надыходзячым святам. Без увагі ў гэты дзень не застаўся ніхто!
Ужо ўпадабаныя пажылым людзям артысты з валанцёрскага атрада стварылі для ўсіх святочны настрой: Паліна Клімовіч выканала некалькі песень, якія апынуліся знаёмыя аўдыторыі, бабулі з дзядулямі з задавальненнем ёй падпявалі; Бараноўская Каця паказала прысутным выступленне па каратэ, а Арына Бабкевіч і Карына Варановіч прадэманстравалі гнуткасць і пластыку, выконваючы гімнастычныя практыкаванні. Першы раз пастаяльцаў аддзялення наведаў удзельнік міні-ініцыятывы БТЧК "Сонца для ўсіх" Арцём Азаркін, які зараз стане пастаянным госцем у пажылых людзей.
Акрамя валанцёраў атрада "Добрае сэрца" пажылых людзей з надыходзячым святам павіншавала старшыня раённай арганізацыі Чырвонага Крыжа Галіна Графутка. Моцнага здароўя, дабрабыту і доўгіх гадоў жыцця пажадала яна пастаяльцам аддзялення.
Фінальным пунктам канцэрта стала ўручэнне памятных падарункаў, якія валанцёры зрабілі сваімі рукамі. Пажылыя людзі шчыра дзякавалі артыстаў за ўвагу, святочны настрой і клопат.
Пастаяльцы аддзялення кругласутачнага знаходжання для грамадзян пажылога ўзросту і інвалідаў заўсёды рады ўвазе і ўжо ў чаканні новых гасцей.